“Nuk është Shakira”, fansat ngrenë dyshime pas ceremonisë hapëse

Paraqitja e Shakirës në ceremoninë hapëse të Kupës së Botës së këtij viti ka shkaktuar reagime të shumta, me teori konspirative që kanë pushtuar rrjetet sociale dhe pretendojnë se në skenë nuk ishte vetë këngëtarja, por një sozi e saj.

Këngëtarja 49-vjeçare u ngjit në skenën e Estadio Azteca në Meksikë, ku interpretoi këngën zyrtare të turneut, “Dai Dai”, së bashku me Burna Boy. Megjithatë, vendimi i saj për të mbajtur syze të errëta gjatë gjithë performancës, si edhe pamja e saj e përgjithshme, nxiti komente dhe spekulime të shumta.

Në platformën X, disa përdorues pretenduan se bëhej fjalë për një sozi, duke theksuar dallime në trup, fytyrë dhe lëvizjet e saj. Të tjerë folën për ndërhyrje estetike të mundshme ose për përdorim të tepruar të grimit. Po ashtu, pati komente që sugjeronin se këngëtarja nuk po këndonte drejtpërdrejt, por po përdorte teknikën e njohur si lip-sync.

“Ky person nuk është Shakira”, shkruante një komentues, ndërsa një tjetër ironizonte: “Çfarë sozie e keqe!”.

Megjithatë, nuk munguan as ata që hodhën poshtë këto pretendime, duke theksuar se disa tipare karakteristike të këngëtares, si një shenjë në ballë, dëshmojnë se në skenë ishte vërtet Shakira dhe jo një person tjetër.