OKB: 15 fëmijë u vranë dhe 62 u plagosën në Liban gjatë një jave, shifra tronditëse

Kombet e Bashkuara kanë njoftuar se 15 fëmijë janë vrarë në Liban dhe 62 të plagosur gjatë shtatë ditëve të fundit pavarësisht “armëpushimit” midis Izraelit dhe Hezbollahut.

UNICEF, agjencia e OKB-së për fëmijët, i quajti shifrat tronditëse dhe theksoi se, sipas ligjit ndërkombëtar humanitar, fëmijët duhet të mbrohen në çdo kohë gjatë konfliktit.

“Sipas Ministrisë së Shëndetit Publik libanez, 77 fëmijë thuhet se janë vrarë ose plagosur vetëm gjatë javës së kaluar”, tha zëdhënësi i UNICEF-it, Ricardo Pires, në një konferencë për mediat në Gjenevë.

“Pesëmbëdhjetë fëmijë u vranë dhe 62 u plagosën në shtatë ditë. Kjo është një mesatare prej 11 fëmijësh çdo 24 orë. Ne e kuptojmë se shumica dërrmuese e këtyre fëmijëve u prekën nga sulmet ajrore në Libanin jugor. Vetëm dje, shtatë fëmijë u vranë dhe 30 u plagosën”, shtoi ai.