“Dhunë policore”- Gazment Bardhi akuzon: Te Spitali i Traumës nuk ka asnjë polic të shtruar, vetëm qytetarë!

Kryetari i Grupit Parlamentar të Partisë Demokratike, Gazment Bardhi, ka reaguar pas përplasjeve mes studentëve protestues dhe policisë në Tiranë, duke dënuar atë që e cilëson si dhunë policore ndaj protestuesve.

Bardhi pretendon se disa qytetarë kanë pësuar dëmtime serioze dhe kërkon lirimin e menjëhershëm të personave të ndaluar, si dhe ndëshkimin e përgjegjësve për dhunën.

Në reagimin e tij, ai shpreh mbështetjen për kërkesat e studentëve dhe pedagogëve, ndërsa u bën thirrje qytetarëve t’i bashkohen protestës dhe kërkon largimin e kryeministrit Edi Rama.

Reagimi i plotë i Gazment Bardhit:

“Dënojmë me forcën më të madhe dhunën e egër të policisë së narkoshtetit kundër studentëve, të cilët janë duke ushtruar të drejtën kushtetuese për protestë.

Aktualisht në Spitalin e Traumës ku ndodhen kolegët deputetë Jorida Tabaku dhe Tritan Shehu, ndryshe nga sa mashtroi Qeveria, nuk ka asnjë punonjës policie të shtruar në spital, ndërkohe që ka të paktën 3 qytetarë me dëmtime serioze që po marrin trajtim mjekësor.

I bëjmë thirrje çdo studenti dhe studenteje, çdo qytetari të lirë, të Tiranës dhe gjithë Shqipërisë, pa dallim partie dhe ideologjie, që ashtu si në vitin 1991, t’i bashkohet rinisë studentore.

Theksojmë se kërkesat e studentëve dhe të pedagogëve dhe qytetarëve janë të drejta dhe ne i mbështesim plotësisht. Gjithashtu, për këto kërkesa dhe për shumë të tjera, të fermerëve, minatorëve, fasonëve, profesioneve të lira, ka vetëm një zgjidhje: largim i menjëhershëm i Edi Ramës, kreut të narkoshtetit.

Kërkojmë lirimin e menjëhershëm të të ndaluarve në mënyrë të paligjshme dhe dënimin e autorëve dhe urdhëruesve të dhunës shtazore!”.