Opozita proteston para Kuvendit, kërkon largimin e Metës

Mbështetës të Partisë Demokratike kanë nisur paraditen e sotme protestën e paralajmëruar para godinës së Kuvendit, ndërsa pritet të nisë seanca plenare e radhës.

Protestuesit vazhdojnë të këmbëngulin në kërkesën e tyre për largimin e Ilir Metës nga posti i kryetarit të parlamentit, i akuzuar nga deputeti Tom Doshi se ka porositur vrasjen e tij dhe të deputetit demokrat, Mëhill Fufi.
Policia e Shtetit ka marrë të gjitha masat për zhvillimin e qetë dhe normal të protestës, e paralajmëruar një ditë më parë nga opozita.

Ndërkohë, deputetë të Partisë Demokratike, të kryesuar nga kreu i grupit parlamentar, Edi Paloka, iu bashkuan protestuesve, duke u shprehur në mbështetje të kërkesës për dorëheqjen e Metës.
“Meta të ikë, të japë dorëheqjen e të dalë para drejtësisë. Ne, deputetët e PD-së dhe të opozitës, tani do të hyjmë në sallën e Kuvendit, do të mbajmë një fjalë e do të kthehemi prapë te ju (protestuesit). Ne do të kërkojmë drejtësi deri në fund”, iu drejtua Paloka protestuesve.
Më pas deputetët demokratë hynë në selinë e parlamentit, ndërsa pritet të nisë seanca plenare e radhës, drejtimi i së cilës sot nuk do të jetë nga kryeparlamentari Meta, i cili ndodhet në Zvicër, në një vizitë zyrtare.