Leskaj, Presidentit të KiE: Ndalimi i Haradinajt, precedent i rrezikshëm
Nënkryetarja e Kuvendit, Valentina Leskaj i ka dërguar një letër Presidentit të Asamblesë Parlamentare të KiE-s, Pedro Agramunt, në lidhje me ndalimin në Francë të kreut të Aleancës për Ardhmërinë e Kosovës, Ramush Haradinaj.
Në letër, Leskaj thotë se ndalimi i tij në një vend anëtar të KiE-së dhe në bazë të një urdhri të vjetër arresti të Serbisë është i papritur e njëkohësisht i papranueshëm. Ai përbën një shkelje flagrante të të drejtave themelore të njeriut.
Duke kujtuar pafajësinë e dy Dhomave të Tribunalit të Hagës për ish-Jugosllavinë, si dhe dialogun midis Prishtinës dhe Beogradit, Leskaj nënvizon se ky ndalim krijon precedentë të rrezikshëm.
“Ky veprim jo vetëm që nuk ndihmon normalizimin e marrëdhënieve mes dy vendeve por krijon precedentin e rrezikshëm të mosrespektimit të drejtësisë dhe shkeljes së të drejtat themelore të njeriut (vendimet e Tribunalit të Hagës për ish-Jugosllavinë). Një ngjarje e tillë nuk mund ta lërë indiferent KiE-n, e cila është angazhuar seriozisht në promovimin dhe respektimin e të drejtave të njeriut jo vetëm në Kosovë por në të gjithë rajonin e Ballkanit”, thuhet në letër.
“Personalisht mirëpres një reagim dhe qëndrim të KiE-s si dhe kontributin e saj për lirimin e menjëhershëm të z. Haradinaj dhe sensibilizimin e të gjitha vendeve anëtare për mos përsëritjen e precedentëve të tillë në të ardhmen”, thuhet në letër.
