Pamje të frikshme nga tërmeti në Kretë/ Një 58-vjeçar humb jetën, një shqiptar i plagosur rëndë nga shembja e kishës. Dëmet materiale të shumta

Bëhet fjalë për një 58 vjeçar që ka humbur jetën pasi është shembur një pjesë e kishës në fshatin Arkalohori, ndërsa një i plagosur rëndë është shtetas shqiptar, i cili punonte në kishën që u dëmtua. Gjithashtu ka informacione për dy persona të lënduar në fshatin Patsidero dhe tre persona që janë bllokuar brenda një shtëpie,  e cila ka pësuar dëme të mëdha në fshatin Arkalohori. Gjithsej numri i personave të lënduar ka shkuar në 9.

Mbrojtja Civile ka aktivizuar me njëherë planin “Tërmeti” ndërsa një grup i ekipit të shpëtimit EMAK është nisur me një avion C130 bashkë me zyrtarë të qeverisë për të inspektuar gjendjen dhe për të dhënë ndihmën e parë në zonat e dëmtuara. Dëme materiale vazhdojnë të raportohen në disa fshatra të zonës afër epiqendrës së tërmetit.

Ndërkohë vazhdojnë të regjistrohen edhe lëkundje të tjera dy prej tyre me fuqi 3.7 dhe 4.5 shkalla Rihter.

Sipas sizmiologut te njohur, Costas Papazachos, profesor në Universitetin Aristotelis të Selanikut, nuk ka gjasa që të ketë një tërmet tjetër më të fuqishëm se sa tërmeti kryesor.

Sipas tij  në zonën Arkalochori, ka pasur aktivitet sizmik gjatë gjithë verës me tërmete të vegjël. Ai ka shtuar gjithashtu se bëhet fjalë për një termet shumë serioz dhe se duhet t’u kushtohet vëmendje fshatrave të zonës përreth sa u përket ndërtesave që janë dëmtuar, të cilat mund të shkatërrohen edhe me një goditje pasuese më pak të fuqishme dhe leëkundje të tilla do të jenë të shumta në orët në vijim.