Pamjet me dron zbulojnë strehën e autorit të vrasjes së efektivit në Maliq

Këto janë pamjet me dron që tregojnë vendin ku fshihej 43-vjeçari V.B, 43 vjeç, i cili vrau këtë të enjte, efektivin e forcave ‘Shqiponja” Enea Mekolli dhe plagosi kolegun e këtij të fundit, Edison Adrin, gjatë një operacioni për arrestimin  e tij.

Në pamje shihet stani i izoluar në një zonë të thellë malore, i cili shërbente si vendstrehim për 43-vjeçarin. Objekti ishte i pajisur edhe me kamera sigurie, çka dyshohet se i mundësonte të shumëkërkuarit të monitoronte lëvizjet përreth dhe t’i shmangej forcave të rendit.

Sipas informacioneve të siguruara nga gazetari i Klan News, Besar Bajraktaraj, 43-vjeçari me inicialet V.B. ka qenë më herët pjesë e ushtrisë.

43-vjeçari ishte në kërkim prej vitit 2016 dhe rezultonte i dënuar me 10 vite burg për prodhim dhe trafik narkotikësh. Vendimi i dhënë nga Gjykata e Shkallës së Parë të Korçës në vitin 2017 ishte lënë në fuqi edhe nga Apeli dhe Gjykata e Lartë.

Operacioni për arrestimin e tij u zhvillua pasi policia kishte siguruar informacione të sakta për vendndodhjen e tij. Sipas autoriteteve, efektivët i kanë bërë thirrje të dorëzohej, por ai ka hapur zjarr ndaj tyre. Nga përplasja me armë humbi jetën efektivi Enea Mekolli, ndërsa mbeti i plagosur efektivi Edison Adri.

Pas shkëmbimit të zjarrit, autori u plagos dhe u arrestua nga forcat e policisë. Ngjarja ka shkaktuar reagime të shumta, ndërsa autoritetet po vijojnë hetimet për zbardhjen e plotë të rrethanave të saj.

/tvklan.al