Pas incidentit, gjykata lëshon urdhër mbrojtjeje për Sabrina Carpenter

Këngëtarja dhe aktorja amerikane Sabrina Carpenter ka siguruar një urdhër mbrojtjeje pesëvjeçar ndaj një burri, i cili sipas dokumenteve gjyqësore dyshohet se ka tentuar në mënyrë të përsëritur të hyjë në banesën e saj në Los Anxhelos.

Sipas vendimit të gjykatës, 31-vjeçari William Applegate duhet të qëndrojë të paktën rreth 91 metra largCarpenter, motrës së saj dhe partnerit të motrës, të cilët jetojnë në të njëjtën banesë. Ai gjithashtu është urdhëruar të mos kontaktojë këngëtaren në asnjë mënyrë dhe të mos posedojë armë zjarri.

Në dokumentet e paraqitura në gjykatë, Carpenter deklaron se Applegate u arrestua pasi goditi një roje sigurie dhe arriti deri te dera e shtëpisë së saj.

Gjatë seancës gjyqësore, Applegate këmbënguli se ai dhe Carpenter duhej të ishin bashkë, duke bërë deklarata të pazakonta për një program të klasifikuar ushtarak dhe sigurinë globale.

Avokatja e këngëtares argumentoi se Carpenter ka frikë për sigurinë e saj dhe të familjarëve të saj për shkak të veprimeve të tij.

Ndërkohë, hetimet ndaj Applegate vijojnë, megjithëse deri më tani nuk janë ngritur akuza penale zyrtare.