Pentagoni përgatit 4 skenarë për praninë ushtarake amerikane në Europë

Pentagoni po përgatit një rishikim të gjerë të pranisë ushtarake amerikane në Evropë, me të paktën katër grupe opsionesh që pritet të jenë gati deri më 6 nëntor. Dokumentet e brendshme të siguruara nga Reuters tregojnë se në shqyrtim është edhe mundësia e reduktimit të trupave amerikane në kontinent, teksa procesi ka shkaktuar shqetësim te aleatët evropianë.

Pentagoni po hap një nga rishikimet më të rëndësishme të viteve të fundit për praninë ushtarake amerikane në Evropë. Deri më 6 nëntor, ushtria amerikane pritet të përgatisë të paktën katër grupe alternativash për mënyrën se si do të pozicionohen trupat amerikane në kontinent, ndërsa vendimi përfundimtar pritet të merret deri në dhjetor.

Në qendër të këtij procesi janë rreth 80 mijë trupa amerikane që aktualisht shërbejnë në Evropë. Aleatët evropianë po e ndjekin me shqetësim rishikimin, pasi një reduktim i mundshëm i forcave amerikane do të ndryshonte ndjeshëm ekuilibrin e sigurisë brenda NATO-s.

Sipas dokumentit të brendshëm të siguruar nga Reuters, gjenerali më i lartë amerikan në Evropë pritet të marrë pjesë deri më 18 shtator në një takim informues me drejtuesin e politikave të Pentagonit, Elbridge Colby. Nga ky proces pritet të dalin alternativat që më pas do t’i paraqiten Sekretarit të Mbrojtjes, Pete Hegseth.

Administrata Trump ka kërkuar prej kohësh që aleatët evropianë të marrin më shumë përgjegjësi për mbrojtjen e kontinentit. Për Uashingtonin, prania amerikane në Evropë duhet të shoqërohet me një angazhim më të madh financiar dhe ushtarak nga vendet e tjera të NATO-s.

Sekretari i Mbrojtjes, Pete Hegseth, ka kritikuar disa prej aleatëve për atë që e konsideron mbështetje të pamjaftueshme ndaj Shteteve të Bashkuara. Nga ana tjetër, Sekretari i Përgjithshëm i NATO-s, Mark Rutte, ka pranuar se shqetësimet amerikane ekzistojnë, por ka theksuar se shumica e vendeve evropiane kanë dhënë mbështetje.

Tashmë Pentagoni do të analizojë përgjigjet dhe kapacitetet e aleatëve, përpara se të përcaktojë skenarët për të ardhmen e trupave amerikane në Evropë.

Nëse rishikimi do të çojë në një tërheqje të pjesshme, ndryshimi do të ishte më shumë se një riorganizim ushtarak: do të ishte një sinjal i rëndësishëm për mënyrën se si Uashingtoni e sheh rolin e tij në sigurinë evropiane.