Përmbytje në Nepal, 17 të vdekur dhe qindra të zhdukur

Të paktën 17 persona kanë humbur jetën dhe qindra të tjerë rezultojnë të zhdukur pas një përmbytjeje të menjëhershme në kufirin mes Nepalit dhe Tibetit.

Sipas të dhënave paraprake të Bordit Turistik të Nepalit, mes personave të zhdukur janë të paktën 291 turistë të huaj. Më shumë se 100 prej tyre dyshohet se janë shtetas indianë, ndërsa 12 janë nga Mbretëria e Bashkuar.

Përmbytjet shkaktuan dëme të mëdha në zonë. Pamjet e verifikuara tregojnë një urë që shembet nën forcën e ujërave, ndërsa disa ndërtesa shumëkatëshe janë dëmtuar rëndë. Në distriktin Nuwakot, ujërat me baltë kanë përmbytur pjesërisht banesa dhe zona të tjera të banuara.

Autoritetet kanë nisur operacionet e kërkim-shpëtimit për gjetjen e personave të zhdukur, ndërsa numri i viktimave mund të rritet.

Ministri i Jashtëm i Nepalit tha se raportet paraprake sugjerojnë se përmbytja mund të jetë shkaktuar nga një tërmet që ka shkaktuar një ortek, duke sjellë më pas një valë të menjëhershme uji drejt zonave të banuara.

Situata mbetet dinamike, ndërsa autoritetet vijojnë të mbledhin të dhëna për viktimat dhe personat e zhdukur.