Plavë: Banorët e Ruda Poljes ankohen për rrugën e re — “Në shtëpi arrihet vetëm me bager”
Punimet për zgjerimin dhe asfaltimin e rrugës në lagjen Rudo Polje të Plavës kanë lënë disa banorë pa hyrje normale në shtëpi; komuna thotë se gjendja është fazë punimesh dhe do të rregullohet.
Banorët e lagjes Rudo Polje në Plavë shprehin pakënaqësi ndaj mënyrës së realizimit të punimeve për zgjerimin dhe asfaltimin e rrugës. Në vend të një aksi modern, siç prisnin, ata thonë se janë përballur me vështirësi serioze për të arritur deri te shtëpitë e tyre, duke e quajtur ndërhyrjen të pamenduar dhe joprofesionale.
Shuço Redžepagiq, një nga banorët e prekur, tregon se pas përfundimit të punimeve hyrja në oborrin e tij është bërë pothuajse e pamundur: trotuari dhe tamponi i ri u ngritën rreth një metër mbi nivelin e oborrit, duke e lënë atë të izoluar. “Nga rruga kryesore në oborrin tim tani arrihet vetëm me bager dhe kamion”, thotë ai.
Redžepagiq akuzon se projekti është hartuar gabimisht nga nipi i tij, Armin Redžepagiq, në bashkëpunim me fqinjin Eko Bašiq. Sipas tij, rruga është futur brenda pronës së tij private, ndërsa pronat e autorëve të projektit janë lënë të paprekura.
Ai thotë se tashmë e ka ngritur shqetësimin te kryetari i komunës, Nihad Camoviq, dhe paralajmëron se, nëse gjendja nuk rregullohet, do t’i drejtohet inspekcioneve shtetërore dhe ministrisë përkatëse për të kërkuar ndërhyrje.
Nga ana tjetër, komuna e Plavës, përmes kryetarit Nihad Camoviq, thotë se punimet po kryhen në përputhje me projektin kryesor dhe dokumentacionin planor. Sipas komunës, gjendja aktuale është vetëm një fazë e punimeve dhe jo gjendja përfundimtare, dhe pas përfundimit të tyre çdo hyrje ekzistuese do të jetë plotësisht funksionale.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.