Polemika dhe sherr për kartonin e Camavinga, Arbeloa: E padrejtë, e pashpjegueshme!

Kartoni i dytë i verdhë për mesfushorin francez për humbje kohe ka tërbuar Realin: “Nuk nxirret jashtë një lojtar për diçka të tillë”.

Në minutat e fundit të Bayern-Real Madrid ndodhi gjithçka. Episodi që ndezi nervat në një ndeshje deri në atë moment shumë korrekte, ishte kartoni i dytë i verdhë për Eduardo Camavinga. Në minutën e 86-të, francezi, i ndëshkuar me të verdhë, ndali Kane në mesfushë. Kontakt i lehtë, që nuk mund të shoqërohej më të verdhë nga Vinçiç.

Kartoni i dytë i verdhë nuk erdhi për faullin, por për faktin që Camavinga mori topin në duar për të ngadalësuar rifillimin e lojës. Humbje kohe, që arbitri slloven e ndëshkoi me të verdhë dhe rrjedhimisht të kuq, duke e adresuar çështjen e kualifikimit drejt gjermanëve.

Për 5 minuta Bayern shënoi dy gola dhe siguroi gjysmëfinalen. Pas vërshëllimës përfundimtare shpërtheu kaosi. Arda Guler u ndëshkua me karton të kuq për protesta, ndërsa arbitri mezi doli nga fusha për shkak se u rrethua nga lojtarët madrilenë.

Tensioni përfshiu edhe lojtarët e Bayern. Në tunel Kimmich dhe Upamecano u përplasën me Bellingham, nga më nervozët te Reali.

Deklaratë kundër arbitrit edhe nga trajneri i Real Madrid, Alvaro Arbeloa: “Jemi të zhgënjyer dhe të nervozuar për fundin e ndeshjes. Kartoni i Camavinga? Pas atij vendimi mori fund gjithçka. Askush nuk di ta shpjegojë si mund të nxirret jashtë një lojtar për një episod të tillë.

Jam krenar për lojtarët, meritonin më shumë. Kur humb në këtë mënyrë askush nuk mund të jetë i kënaqur. Jemi të zhgënjyer dhe të frustruar. Ajo që ndodhi ishte e padrejtë. Në fund duhet të komplimentojmë Bayern”.

The post Polemika dhe sherr për kartonin e Camavinga, Arbeloa: E padrejtë, e pashpjegueshme! appeared first on RTSH.