PR: Ndalni kompensimin e pronave derisa të shprehet Kushtetuesja

Kur Agjencia e Trajtimit të Pronave po publikon listat e ish-pronarëve që përfitojnë kompensim financiar të pronës, Partia Republikane i kërkon qeverisë të ndërpresë procesin derisa Gjykata Kushtetuese të shprehet në mënyrë përfundimtare mbi ligjin e ri.
Republikanët e quajnë absurde metodologjinë që po përdoret për të llogaritur vlerën e pronës, bazuar në gjendjen e vitit 1945.
“Gjykata Kushtetuese e ka çuar draftin e ligjit në Komisionin e Venecias. Kemi bindjen se ky komision, bazuar në konventat ndërkombëtare për mbrojtjen e të drejtave të njeriut dhe vendimet e Gjykatës së Strasburgut, do t’i japë zgjidhje të drejtë problemit të pronës në Shqipëri, duke rekomanduar rrëzimin e këtij ligji”, tha Maksim Begeja, PR.
Rrëzimin e ligjit, sipas Partisë Republikane e dikton edhe vendimi i marrë dy muaj më parë nga Gjykata e Strasburgut.
“Kjo gjykatë nuk pranoi mënyrën e kompensimit të pronarëve sipas gjendjes aktuale të pronës në vitin 1945, por theksoi se kompensimi do të bëhet mbi bazën e ligjit të vitit 2008, i cili parashikon kompensim me vlerën reale të tregut. Bazuar në këtë arsyetim, Gjykata e Strasburgut detyron qeverinë shqiptare që t’u paguajë 21 pronarëve shqiptarë rreth 6 mln euro”, tha më tej Maksim Begeja.
Partia Republikane deklaron se kompensimi sipas ligjit të ri do të rëndojë faturën financiare që taksapaguesit shqiptarë do të paguajnë si pasojë e gjobave të Strasburgut, shumë që deri më sot kap shifrën 37 mln euro, nga të cilat qeveria ka paguar 10 mln.