Presidenti Begaj: Mirënjohje për zjarrfikësit, autorët e zjarrvënieve të ndëshkohen

Presidenti i Republikës, Bajram Begaj, ka reaguar për situatën e zjarreve në vend, duke vlerësuar sakrificën e zjarrfikësve, efektivëve të Forcave të Armatosura dhe të gjithë personave të angazhuar në përballimin e flakëve.

Në një postim në rrjetet sociale, kreu i shtetit shprehet:

“Në këto ditë me temperatura të larta, kur shumë zjarre kanë rënë në disa zona të vendit, zjarrfikësit, efektivët e Forcave të Armatosura dhe të gjithë ata që po luftojnë me flakët meritojnë mirënjohjen tonë. Me guxim, përkushtim dhe sakrificë, ata po mbrojnë jetën, familjet, banesat dhe pasuritë tona. Respekt për çdo zjarrfikës dhe efektiv që po përballet me rrezikun në vijën e parë.”

Presidenti bëri thirrje për ndëshkimin e autorëve të zjarrvënieve, duke theksuar: “Keqbërësit që i vënë flakën vendit duhet të ndëshkohen ashpër dhe sipas ligjit.”

Në fund të reagimit, Begaj u bëri apel qytetarëve të tregojnë përgjegjësi dhe solidaritet: “Përballë kësaj situate, secili prej nesh ka një detyrë: të jemi të kujdesshëm, të respektojmë udhëzimet e autoriteteve, të mos rrezikojmë jetën dhe të bëjmë pjesën tonë për të mbrojtur komunitetin, pronën dhe natyrën. Sot, Shqipëria ka nevojë për solidaritetin dhe përgjegjësinë e të gjithëve.”