Presidenti i Këshillit Evropian, turne zyrtar në Ballkanin Perëndimor, më 2 qershor takim me Ramën dhe Begajn, Costa: Angazhimi i BE-së ndaj rajonit është real

Presidenti i Këshillit Evropian, António Costa, do të vizitojë Tiranën të martën, më 2 qershor 2026, si pjesë e një turneu zyrtar pesëditor në gjashtë vendet e Ballkanit Perëndimor. Gjatë ndalesës së tij në kryeqytetin shqiptar, zyrtari i lartë i Bashkimit Evropian do të zhvillojë takime të nivelit të lartë me Kryeministrin Edi Rama dhe Presidentin e Republikës, Bajram Begaj.

Përveç agjendës institucionale, Costa do të vizitojë edhe studentët e Kampusit të Tiranës të Kolegjit të Evropës, përpara se të mbajë një konferencë të përbashkët për shtyp me Kryeministrin Rama në orën 12:15.

Mesazhi i Brukselit, momenti për rezultate reale

Përpara nisjes së këtij turneu strategjik, i cili do të zhvillohet nga data 1 deri më 5 qershor, Presidenti Costa vuri në dukje se procesi i integrimit ka hyrë në një fazë pragmatike ku kërkohet përmbushje e detyrimeve nga të dyja palët.

Kreu i Këshillit Evropian specifikoi mesazhin e tij politik për rajonin:

“Turneu im i dytë në Ballkanin Perëndimor dërgon një sinjal të qartë: angazhimi i BE-së ndaj rajonit është real; po aq real sa edhe mundësia për zgjerim. Momenti është aty. Tani është koha për të dhënë rezultate.”

Itinerari i plotë i turneut rajonal

Vizita në Tiranë pason ndalesën e parë të Presidentit Costa në Sarajevë (1 qershor) dhe do të pasohet nga një agjendë e ngjeshur diplomatike në Shkup, Prishtinë dhe Beograd, përpara se të kulmojë në Mal të Zi:

E hënë, 1 qershor (Sarajevë)

Takim me anëtarët e Presidencës së Bosnjë-Hercegovinës (Beqiroviç, Cvijanoviç, Komshiq) dhe Kryetaren e Këshillit të Ministrave, Borjana Kristo.

E martë, 2 qershor (Tiranë & Shkup)

Pas takimeve dhe konferencës në Tiranë, Costa do të udhëtojë pasdite drejt Shkupit për t’u takuar me Kryeministrin Mickoski.

E mërkurë, 3 qershor (Prishtinë)

Takime me Presidenten në detyrë Albulena Haxhiu, kryeministrin Albin Kurti dhe krerët e opozitës kosovare.

E enjte, 4 qershor (Beograd & Mal i Zi)

Takim me Presidenten serb Aleksandar Vuçiç dhe Kryetaren e Parlamentit Ana Brnabiç. Turneu zhvendoset mbrëmjen e së enjtes në Mal të Zi për një darkë zyrtare të ftuar nga Presidenti Jakov Milatoviç në Tivat, duke shënuar edhe 20-vjetorin e rivendosjes së pavarësisë së vendit.

Samiti i Tivatit dhe agjenda e stabilizimit

Më 5 qershor, punimet do të përqendrohen tërësisht te Samiti BE-Ballkani Perëndimor në Tivat, nën tematikën qendrore “Prosperiteti dhe stabiliteti i përbashkët i BE-së dhe Ballkanit Perëndimor”.

Sipas protokollit zyrtar, pas përfundimit të sesioneve të samitit, do të mbahet një deklaratë e përbashkët për median:

“Më 5 qershor, në orën 15:30, Presidenti Costa do të bashkëkryesojë konferencën përmbyllëse për shtyp së bashku me Presidenten e Komisionit Evropian, Ursula von der Leyen, dhe Presidentin malazez, Jakov Milatoviç.”