Presidentja e Kosovës pret në takim akademikun Anastas Angjeli
Presidentja e Republikës së Kosovës, Justina Shiroka-Pula, ka pritur në një takim në Prishtinë akademikun Anastas Angjeli, kryetar i Komisionit të Ekonomisë pranë Akademisë së Shkencave të Shqipërisë.
Lajmi është bërë i ditur nga Akademia e Shkencave e Shqipërisë, e cila njofton se takimi u zhvillua gjatë një vizite të akademikut Angjeli në Kosovë.
Sipas njoftimit, Angjeli e uroi Presidenten Shiroka-Pula për marrjen e detyrës së lartë shtetërore. Gjatë bisedës u diskutua për forcimin e bashkëpunimit ndërmjet institucioneve akademike të Shqipërisë dhe Kosovës, si dhe për mundësitë e realizimit të projekteve dhe iniciativave të përbashkëta.
Presidentja Shiroka-Pula theksoi rëndësinë e bashkëpunimit institucional për zhvillimin e shkencës, promovimin e dijes dhe forcimin e mëtejshëm të marrëdhënieve akademike ndërmjet dy vendeve.
Në takim, akademiku Anastas Angjeli shoqërohej nga akademiku Besnik Krasniqi, përfaqësues i Akademisë së Shkencave dhe Arteve të Kosovës, si dhe nga poeti Lulzim Tafa, akademik i jashtëm i Akademisë së Shkencave të Shqipërisë.
Akademia e Shkencave e Shqipërisë e ka vlerësuar takimin si një dëshmi tjetër të marrëdhënieve të ngushta akademike dhe shkencore ndërmjet Shqipërisë dhe Kosovës.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.