Prezantuesi i famshëm i “Top Gear” diagnostikohet me kancer

Prezantuesi britanik Jeremy Clarkson vuan nga kanceri. Ikona e programit të famshëm “Top Gear” njoftoi lajmin gjatë një episodi të shfaqjes së tij “Clarkson’s Farm”. 

66-vjeçari ua komunikoi diagnozën protagonistëve të serialit Kaleb Cooper dhe Charlie Ireland, të dy u shfaqën dukshëm të tronditur nga lajmi. Sipas BBC, Clarkson ishte diagnostikuar me kancer agresiv të prostatës, ende në fazat e hershme. 

“Zakonisht përpiqemi ta bëjmë shfaqjen baritore, simpatike, të gëzueshme, por dy episodet e fundit që dolën sonte nuk janë të tilla. Janë të vështira për t’u parë”, – shkroi 66-vjeçari në mediat sociale. 

Postimi i tij në Instagram u bë shpejt viral dhe shumë njerëz bënë komente duke shprehur mbështetje dhe duke i dhënë guxim. 

Vetë ish-prezantuesi i Top Gear nuk specifikoi fazën e kancerit me të cilin u diagnostikua, por e përshkroi atë si “agresiv” dhe shpjegoi se, si pjesë e trajtimit të tij, një pjesë e prostatës ishte hequr. 

“U zhduka javën e kaluar sepse bëra një biopsi, dhe është kancer, dhe është agresiv, por është shumë herët,” tha ai. Clarkson shtoi se e dinte që nga maji. “Ju premtoj se do të jem mirë,” tha ai, duke shtuar se do të ishte jashtë loje “për pak kohë”.

I njohur si një nga prezantuesit më të famshëm televizivë në Mbretërinë e Bashkuar, Jeremy Clarkson ka prezantuar programe të tilla si Top Gear, The Grand Tour dhe Who Wants to Be a Millionaire? ©LAPSI.al