Procesi i vettingut, Braho: U rrit llogaridhënia e drejtësisë ndaj qytetarëve

Në konferencën e sotme më 17 qershor, ku u diskutua për procesin e vettingut, mbajti fjalën edhe kreu i SPAK, Klodian Braho.

Braho u shpreh se vettingu ishte një proces i domosdoshëm, që qytetarët të krijojnë besim tek drejtësia. Ai tha se duhet që standardet e arritura në drejtësi nga ky proces, të mund të mbrohen.

Kreu i SPAK Klodian Braho: Vettingu ndikoi në ripërtëritjen e sistemit të drejtësisë. Besimi i qytetarëve tek drejtësia nuk mund të kërkohet pa përgjegjshmëri individuale. Standardet e vettingut reflektohen dhe në punën e përditshme. Gjyqtarët dhe prokurorët tashmë kanë kaluar në filtra të sigurt, që qytetarët të krijojnë besim tek drejtësia. Dua të falënderoj të gjithë ata, që morën pjesë në këtë proces historik.

Për SPAK, vettingu ka pasur një rol të veçantë. Tashmë drejtësia përfaqëson interesin publik me profesionalizëm e me paanshmëri. Institucionet e reja të dala nga reforma në drejtësi tashmë kanë pjekurinë e duhur. Tani duhet që të ruajmë standardet që kemi arritur.