Projekti i rijetëzimit pranë Sahatit, mbyllet tregu në qendër të Vlorës, ankohen blerësit

Ka nisur zbatimi i projektit për rijetëzimin e zonës pranë Sahatit në Vlorë, projekt i cili prek edhe tregun e fruta-perimeve në qendër të qytetit. Mëngjesin e kësaj të premteje tregu është gjetur i mbyllur, ndërsa në hyrje dhe dalje të tij janë vendosur efektivë policie që nuk lejojnë tregtarët të ushtrojnë aktivitetin e tyre.

Në treg nuk janë lejuar të hyjnë as blerësit, pasi tregtarët pritet të zhvendosen drejt zonës së Jallisë së Nartës. Sipas tregtarëve, vendi i ri i përcaktuar nga autoritetet është i papërshtatshëm dhe shumë larg qytetit, çka sipas tyre do të ndikojë drejtpërdrejt në punën dhe të ardhurat e tyre.

Ata shprehen se kanë furnizuar mallra që rrezikojnë t’u mbeten stok dhe kërkojnë shtyrjen e afateve të punimeve, në mënyrë që të kenë mundësi të vijojnë aktivitetin edhe për një periudhë të shkurtër deri në shitjen e produkteve që kanë aktualisht. Për këtë problematikë, një pjesë e tregtarëve kanë zhvilluar edhe një takim në Bashkinë e Vlorës.

Pakënaqësi kanë shprehur edhe qytetarët, të cilët thonë se me largimin e tregut nga qendra do ta kenë të vështirë të sigurojnë produkte të freskëta. Disa prej blerësve janë përplasur verbalisht me policinë bashkiake dhe efektivët e policisë, pasi nuk janë lejuar të futen në ambientet e tregut.