Prokuroria e Novi Sadit i kërkon policisë të identifikojë pjesëmarrësit në përleshjen e mbrëmshme te tregu i Futoškës

Prokuroria e Lartë Publike në Novi Sad i ka dërguar sot Policisë së Novi Sadit kërkesën për të tërhequr videopamjet nga të gjitha kamerat e mbikëqyrjes që mbulojnë vendin e ngjarjes së mbrëmjes së së martës, kur rreth orës 22:00 në kryqëzimin e Bulevardit të Çlirimit dhe rrugës Jevrejska shpërtheu përleshja mes mbështetësve të Partisë Progresive Serbe dhe mbështetësve të Listës Studentore, siç njofton gazeta serbe Danas.

Sipas prokurorisë, pas shqyrtimit të detajuar të pamjeve të tërhequra dhe të atyre të publikuara në rrjetet sociale, policia duhet të përcaktojë identitetin e personave që morën pjesë në përleshje. Prokuroria njofton se dyshohet për veprën penale “sjellje e dhunshme në manifestim sportiv ose tubim publik” dhe thekson se “çdo formë dhune do të sanksionohet ligjërisht”.

Incidentet te tregu i Futoškës, siç shkruan Danas, nisën kur aktivistët e SNS-së erdhën për të provokuar qytetarët e mbledhur që kishin shpalosur transparentët “Studentët fitojnë”. Kandidati i SNS-së për Kuvendin Popullor, Vukashin Gjokoviç, ishte i pari që u përpoq t’ua rrëmbente flamurin “Studentët fitojnë”; përparimtarët u përpoqën disa herë gjatë mbrëmjes t’ua merrnin transparentët, ndërsa rreth orës 22:00 ndodhi përleshja më e madhe mes dy grupeve.