Prokuroria nis verifikimin për vrasjen e një shqiptari në Ekuador Ilir Hidri

Prokuroria për krime të rënda kërkon nga policia e shtetit informacion për shqiptarin e vrarë në Ekuador, Ilir Hidri. Sipas burimeve të brëndëshme është mësuar se prokuroria për krime të rënda për llogari të verifikimit të nisur, ka kërkuar informacion zyrtar nga policia e shtetit për të kaluarën e shtetasit shqiptar, që mendohet se është vrarë në Ekuador.

Sipas akuzës, është kërkuar që të verifikohet nëse është i saktë identiteti i personit të publikuar në mediat ekuadoriane dhe nëse po, të verifikohet e kaluara e tij në Shqipëri dhe lidhjet e mundshme me personat këtu. Kjo për shkak se media në Ekuador, ka publikuar të dhëna se shqiptari i vrarë dyshohet se ishte pjesë e një rrjeti të trafikut të drogës. Por që pas arrestimit në Spanjë, dyshohet se ai ka pranuar të bashkëpuanojë me DEA-n amerikane, e cila në bashkëpunim me autoritetet spanjolle po heton një rrjet të fuqishëm të kokainës nga Ekuadori në Spanjë dhe më pas në Europë. Ky është edhe shkaku që dyshohet se është ekzekutuar, për shkak të bashkëpunimit të tij me DEA-n dhe autoritet e policisë spanjolle.