Protestë e madhe antiqeveritare në Shkup

Një miting i madh qytetar pritet të mbahet sot në Shkup, para Qeverisë së Maqedonisë, me kërkesë për dorëheqje të kryeministrit Nikolla Gruevski dhe kabinetit të tij.

Paralajmërimet janë se do të jetë kjo protesta më e madhe deri tani e mbajtur në Maqedoni. Ajo është një lloj kulmi i protestave të përditshme që shpërthyen në Shkup dhe qytete të tjera, që nga fillimi i publikimit të të ashtuquajturave “bomba” –telefonatave të përgjuara që zbulojnë afera të shumta korruptive dhe veprime jodemokratike të Gruevskit dhe bashkëpunëtorëve të tij partiakë dhe qeveritarë.

Organizator kryesor i protestës është partia opozitare Lidhja Socialdemokrate e Maqedonisë, me në krye liderin Zoran Zaev, por atë e kanë përkrahur edhe shumë organizata qytetare, ndër të cilët edhe Plenumi i Studentëve, i cili ka mobilizuar pjesën më të madhe të popullatës studentore.

Në Shkup pritet që, përkundër opstrukcioneve dhe presioneve të shumta mbi qytetarët nga ana e partisë në pushtet VMRO-DPMNE, të grumbullohen dhjetëra mijëra njerëz nga të gjitha anët e Maqedonisë.

Opozita dhe organizatat qytetare që përkrahin protestat kanë paralajmëruar se tubimi i sotëm nuk do të jetë i fundit, porse aktivitetet e tilla dhe të tjera do të vazhdojnë deri në rënien definitive të Gruevskit.

Ja disa prej kërkesave të protestës: