QSUT mban barrën kryesore të shërbimeve spitalore, me 40% të shtrimeve në rang vendi

Pothuajse 40% e të gjitha shtrimeve spitalore në Shqipëri përqendrohen në një institucion të vetëm, Qendrën Spitalore Universitare “Nënë Tereza”, ndërsa shumë spitale rajonale funksionojnë me nivele të ulëta aktiviteti. Përqendrimi i shërbimeve në pak qendra dhe përdorimi i ulët i një pjese të rrjetit spitalor janë ndër gjetjet kryesore të raportit të Bankës Botërore për financimin dhe efikasitetin e sektorit të shëndetësisë.

Sipas raportit, në vitin 2024 norma mesatare e zënies së shtretërve në spitalet publike ishte vetëm 43%, shumë më poshtë se standardi ndërkombëtar i efikasitetit prej rreth 85%. Ndërkohë, numri i shtretërve spitalorë u rrit në 8 mijë e 911, pavarësisht rënies së popullsisë.

Gjatë vitit 2024, në spitale u shtruan rreth 299 mijë pacientë, ndërsa numri i shtrimeve për 1 mijë banorë u rrit në 127, nga 99 në vitin 2019. Megjithatë, qëndrimet më të shkurtra dhe përqendrimi i pacientëve në disa institucione kanë bërë që një pjesë e shtretërve të mbeten të pashfrytëzuar.

Raporti evidenton se edhe shërbimet e specializuara janë të përqendruara kryesisht në QSUT. Aty kryhen 68% e ndërhyrjeve kardiake dhe 79% e operacioneve të kataraktit, ndërsa radioterapia dhe trajtimi me përshpejtues linear ofrohen vetëm në këtë qendër.

Banka Botërore rekomandon riorganizimin e rrjetit spitalor, konsolidimin e shërbimeve në qendra ekselence dhe ristrukturimin e spitaleve që mbeten me aktivitet të ulët, për të rritur efikasitetin dhe aksesin e pacientëve në kujdesin shëndetësor.