Quantum Systems: dronët e ushtrisë gjermane fluturojnë sërish pas sulmit kibernetik

Siç njofton Reuters, grupi gjerman i teknologjisë së mbrojtjes Quantum Systems tha se dronët në shërbim të ushtrisë gjermane po fluturojnë sërish, pasi ishin pezulluar si masë paraprake pas një sulmi kibernetik muajin e kaluar, në tetor.

Financial Times kishte raportuar të enjten se Bundeswehr-i i kishte pezulluar dronët e prodhuar nga Quantum Systems pas sulmit. Sipas gazetës, pezullimi e kishte penguar kompaninë të merrte pjesë në një stërvitje të fundit me ushtrinë.

Një zëdhënës i Quantum Systems tha në një deklaratë me email se flota po operon normalisht në mbarë botën — përfshirë Gjermaninë dhe Bundeswehr-in — dhe se Bundeswehr-i ishte klienti i vetëm që i pezulloi sistemet si masë paraprake.

Kompania tha se “një sulm aktiv kibernetik nga aktorë armiqësorë” u zbulua në tetor, por u përmbajt nga ekipet e saj të IT-së dhe sigurisë kibernetike “në bashkëpunim të ngushtë dhe transparent me autoritetet”, dhe se nuk ka rrezik në operimin e sistemeve pa pilot për përdoruesit dhe operatorët.

Nuk kishte koment të menjëhershëm nga ushtria gjermane dhe nuk ishte menjëherë e qartë nëse kompani të tjera mund të ishin prekur nga sulmi. Reuters kujton gjithashtu se Quantum Systems nënshkroi muajin e kaluar një marrëveshje për të furnizuar Ukrainën me interceptorë reaktivë.