Rama i përgjigjet Berishës për prokurimet publike: Me Diellën do arrijmë nivelin më të lartë europian

Kreu i qeverisë, Edi Rama,ka dhënë një përgjigje ndaj kryetarit të Partisë Demokratike, Sali Berisha, pasi ky i fundit u shpreh se ka pasur rënie të transparencës në prokurimet publike dhe se kompanitë europiane po përjashtohen nga këto tendera.

Përmes një postimi në platformën “X”, Rama shkruan se integriteti i prokurimeve ka dalë më mirë se shumë nga shtetet e BE-së, duke e cilësuar si një fakt të pakundërshtueshëm.

“Hedh budallai i madh një gur në lumë dhe pastaj të vegjëlit bëjnë si të mençur për ta nxjerrë, duke thënë që integriteti i prokurimeve publike në Shqipëri paska shënuar rënie! Po se si e shënoi këtë rënie, kur në fakt Shqipëria u përfshi për herë të parë në portalin europian të matjes së integritetit të prokurimeve për shtetet e Bashkimit Europia, duke dalë më mirë se sa shumë prej tyre, këtë as i madhi e as të vegjëlit nuk kanë se si e thonë, sepse budallallëku ka kufi vetëm vetveten”, shkruan ai.

Më tej, kryeministri cilëson se Shqipëria ka bërë progres të madh në prokurimet publike dhe se me ndihmën e Diellës, vendi do të renditet në këtë fushë në nivelin më të lartë europian, siç shkruan Rama.

“Rëndësi ka që duan s’duan ata që s’duan, sot Shqipëria vlerësohet ndërkombëtarisht si asnjëherë më parë, edhe në fushën e prokurimeve, ku kemi bërë progres të madh dhe jemi ende në ngjitje, sepse me Diellën në prokurimet publike do të arrijmë brenda këtij mandati, një nivel integriteti e shpejtësie që do të na rendisë në nivelin më të lartë europian, falë Inteligjencës Artificiale”, shkruan Rama në platformën “X”.

Më herët këtë të martë, 12 maj, në një konferencë për shtyp nga selia blu, Berisha argumentoi se të dhënat e publikuara nga organizata europiane Open Tender EU tregojnë se kriteri i transparencës në prokurimet publike në Shqipëri vlerësohet vetëm me 54.5 pikë, pavarësisht se sistemi elektronik i prokurimeve përdoret që nga viti 2010. Sipas tij, kjo tregon se sistemi elektronik nuk po funksionon si duhet dhe se treguesit e transparencës kanë pësuar rënie të ndjeshme ndër vite.

/tvklan.al