Rama për pagat e magjistratëve: Të ulemi në një tryezë pune për një zgjidhje të qëndrueshme

Kryeministri Edi Rama ka reaguar për situatën e krijuar mes ekzekutivit dhe pushtetit gjyqësor lidhur me ligjin për pagat e magjistratëve, duke bërë thirrje për dialog institucional dhe një zgjidhje afatgjatë.

Përmes një reagimi, Rama shprehet se drejtuesit e dy këshillave të sistemit të drejtësisë dhe drejtuesit e institucioneve të gjyqësorit duhet t’i përgjigjen pozitivisht ftesës për t’u ulur në një tryezë të përbashkët pune.

“Uroj dhe besoj që përfaqësuesit e pushtetit gjyqësor, që nga drejtuesit e dy këshillave dhe me radhë drejtuesit e institucioneve të gjyqësorit, do t’i përgjigjen pozitivisht ftesës për t’u ulur së bashku në një tryezë pune pa humbur kohë, e për të adresuar temën e sistemit të pagave të magjistratëve në funksion të një zgjidhjeje të qëndrueshme afatgjatë, e cila i garanton ata përgjithnjë po njëkohësisht garanton edhe ekuilibrin e përgjithëhershëm të piramidës shtetërore të pagave”, shkruan Rama.

Kryeministri bën me dije se në tryezën e propozuar nga qeveria do të mund të marrin pjesë edhe ekspertë të Këshillit të Europës, ndërsa thekson se pritet edhe kontributi i Komisionit Europian për Efiçencën e Drejtësisë.

“Tryeza jonë do të mirëpresë edhe pjesëmarrjen e ekspertëve të Këshillit të Europës, si edhe kontributin e Komisionit Europian për Efiçencën e Drejtësisë”, vijon ai. Rama ka vënë në dukje gjithashtu se pavarësia e magjistratëve dhe niveli i pagave të tyre janë rezultat, sipas tij, i vendimeve dhe vullnetit të shumicës qeverisëse. “Magjistratët e Shqipërisë nuk duhet ta harrojnë se shkalla e tyre deri dje e paimagjinueshme e pavarësisë dhe trajtimi i tyre me pagat më të larta në Republikën e Shqipërisë dhe ndër më të lartat në rajon, nuk ranë nga qielli, po mbajnë vulën e vullnetit të kësaj shumice qeverisëse, e cila nuk do konflikt me gjyqësorin po bashkëveprim institucional, në respekt të pavarësisë së ndërsjellë”, shprehet kryeministri.

Në përfundim, Rama thekson se çdo mosdakordësi mes institucioneve duhet të trajtohet përmes dialogut dhe me qasje institucionale.

POSTIMI I KRYEMINISTRIT Uroj dhe besoj që përfaqësuesit e pushtetit gjyqësor, që nga drejtuesit e dy këshillave dhe me radhë drejtuesit e institucioneve të gjyqësorit, do t’i përgjigjen pozitivisht ftesës për t’u ulur së bashku në një tryezë pune pa humbur kohë, e për të adresuar temën e sistemit të pagave të magjistratëve në funksion të një zgjidhjeje të qëndrueshme afatgjatë, e cila i garanton ata përgjithnjë po njëkohësisht garanton edhe ekuilibrin e përgjithëhershëm të piramidës shtetërore të pagave. Tryeza jonë do të mirëpresë edhe pjesëmarrjen e ekspertëve të Këshillit të Europës, si edhe kontributin e Komisionit Europian për Efiçencën e Drejtësisë.

Magjistratët e Shqipërisë nuk duhet ta harrojnë se shkalla e tyre deri dje e paimagjinueshme e pavarësisë dhe trajtimi i tyre me pagat më të larta në Republikën e Shqipërisë dhe ndër më të lartat në rajon, nuk ranë nga qielli, po mbajnë vulën e vullnetit të kësaj shumice qeverisëse, e cila nuk do konflikt me gjyqësorin po bashkëveprim institucional, në respekt të pavarësisë së ndërsjellë. E nëse kemi mosdakordësi, na takon t’i trajtojmë me urtësi dhe durim duke dhënë një shembull dinjiteti shtetëror për qytetarët tanë e njëkohësisht edhe për partnerët e Shqipërisë🇦🇱⚖️🇪🇺