Rehabilitimi urban i Jugut, nis zbatimi i projekt që kushton 55 milionë euro

Ministria e Zhvillimit Urban dhe Banka Botërore kanë nisur punën për Rehabilitimin Urban të Jugut të Shqipërisë. Projekti me vlerë investimi 55 milion euro do të shtrihet në 5 vitet e ardhshme në qarqet Berat, Fier, Gjirokastër e Vlorë, dhe Bashkitë respektive. Synimi është që nëpërmjet projekteve të infrastrukturës urbane dhe projekteve të rigjenerimit urban, të stimulohet zhvillim ekonomik dhe turistik për rajonin e Jugut, duke krijuar premisa të shtuara për një
lidhje më integrale me komunitetet lokale dhe aktorët e biznesit lokal.

Grupi ndërinstitucional dhe misioni i Bankës Botërore u takua me përfaqësuesit e bashkive që kanë aplikuar për projekte për të detajuar kriteret mbi të cilat do të bëhet selektimi i projekteve që bashkitë kanë paraqitur.

Zëvendësministri i Ministrisë së Zhvillimit Urban, Gjon Radovani në fjalën e tij tha se fondi i akorduar nga Banka Botërore është dy herë më i madh sesa ai fazës së parë të projektit nisur në vitin 2004 dhe përfunduar në vitin 2014.

“Filozofia e investimeve do të jetë identifikimi i zonave fokusale, ku ekonomia do të mund të zhvillohet më shpejt nëse investohet në mënyrë integrale. Çdo bashki që nuk i qëndron kontratës për zbatimin e projekteve si në afate ashtu edhe në cilësinë e zbatimit do të ndëshkohet”, tha zoti Radovani.
Misioni i Bankës Botërore pasi ka marrë projektet ku bashkitë kërkojnë ndërhyrjen me investime ka zbritur në terren dhe ka hartuar një listë kriteresh mbi bazën e të cilave do të përzgjidhen zonat se ku do të ndërhyhet.
Paula Restrepo Cadavid, Menaxhere e Projekteve në misionin e Bankës Botërore u bëri me dije përfaqësuesve të bashkive se jo çdo projekt i paraqitur do të financohet dhe kriteri kryesor është impakti tek banorët.
Pas selektimit të projekteve më të mira, në muajin Qershor pritet të nisë puna për zbatimin e tyre.
Rehabilitimin Urban të Jugut të Shqipërisë synon gjithashtu, të ruajë peizazhin urban dhe kulturor, si dhe të ndihmojë në forcimin e kapaciteteve institucionale të autoriteteve lokale për të menaxhuar më mirë potencialet që administrojnë, duke garantuar një zhvillimin ekonomik dhe turistik lokal e rajonal të qëndrueshëm, me qëllim përmirësimin e kushteve të jetesës së banorëve të këtyre zonave si dhe
gjenerimin e mundësive të reja për punësim.Krijimi i modeleve dhe skemave të suksesshme të partneritetit publik-privat, është një komponent shumë i rëndësishëm që po merret në konsideratë nga
Qeveria dhe MZHU dhe ekspertët e angazhuar, për t’u evidentuar dhe zbatuar në praktikë.