“Revoltë!”/ Nis sot protesta e 17-të në Tiranë, qytetarët kërkojnë dorëheqjen e Edi Ramës

TIRANË – Kryeqyteti pritet të jetë sërish këtë të martë në qendër të mobilizimit qytetar, ndërsa në orën 18:00 do të nisë protesta e 17-të radhazi kundër kryeministrit Edi Rama.

Mijëra qytetarë pritet të mblidhen fillimisht në sheshin “Skënderbej”, për të marshuar më pas drejt bulevardit “Dëshmorët e Kombit”, ku do të zhvillohet tubimi kryesor përpara godinës së Kryeministrisë. Pas kësaj, protestuesit kanë paralajmëruar vijimin e marshimit në rrugët kryesore të Tiranës.

Lëvizja qytetare ka hyrë tashmë në javën e tretë të saj, duke mbajtur çdo ditë protesta dhe marshime në kryeqytet. Pjesëmarrësit deklarojnë se do të vazhdojnë aksionin e tyre deri në plotësimin e kërkesave që kanë artikuluar publikisht, me dorëheqjen e kryeministrit si kërkesën kryesore.

Edhe gjatë protestës së djeshme, mijëra qytetarë mbushën rrugët e Tiranës dhe u ndalën përpara Kryeministrisë, ku u dëgjuan vazhdimisht thirrje si “Rama jepe dorëheqjen”, slogan që është kthyer në simbol të protestave. Në mesin e protestuesve u dëgjuan gjithashtu thirrje të tjera, mes tyre “Rama në burg, Berisha në burg” dhe “Ju erdhi fundi”.

Me pjesëmarrje të lartë dhe marshime që kanë përshkuar çdo ditë rrugët e kryeqytetit, protesta e sotme pritet të jetë një tjetër demonstrim i rëndësishëm i mobilizimit qytetar dhe i pakënaqësisë së shprehur nga protestuesit ndaj qeverisë.