Rezoluta e DOM-it për zhvillim të rregulluar të qendrave të të dhënave u pranua nga Partia e Gjelbër Europiane

SHKUP – Me nismën e partisë DOM, propozim-rezoluta për zhvillim të rregulluar të qendrave të të dhënave dhe mbrojtjen e energjisë, burimeve ujore dhe komuniteteve lokale u pranua me mbështetje të fortë nga partitë e gjelbra motra dhe do të vihet në votim në Kongresin e ardhshëm të Partisë së Gjelbër Europiane në Varshavë.

DOM thekson se Maqedonia është shembull konkret i nevojës për një kuadër të tillë: ndryshimet ligjore të miratuara këtë vit pas dyerve të mbyllura lehtësuan zhvillimin e qendrave të të dhënave me regjim të thjeshtuar të planifikimit urbanistik. Qeveria njoftoi një Qendër Kombëtare të të dhënave dhe konfirmoi bisedime me gjashtë kompani për financimin e saj, por kushtet mbeten të mbyllura për publikun. Krahas Qendrës Kombëtare po hapet hapësirë edhe për qendra komerciale, siç tregoi rasti i Pehçevës, ndërsa negociatat zhvillohen pa transparencë dhe pa përfshirjen e ekspertëve dhe komunitetit lokal.

Europa po rrit me shpejtësi kapacitetin e qendrave të të dhënave; në Parlamentin Europian zhvillohet debat intensiv, sidomos me rritjen e inteligjencës artificiale. Deri në vitin 2030, konsumi i energjisë elektrike i qendrave të të dhënave në BE pritet të arrijë 114 TWh, rreth 3,2% të konsumit total. Në shtator, Komisioni Europian propozoi një skemë të përbashkët vlerësimi dhe nisi konsultimin për standarde minimale, aktualisht jo të detyrueshme.

DOM kërkon kritere europiane të qarta, precize dhe të detyrueshme për energjinë, ujin dhe rrjetin elektroenergjetik, me tregues të matshëm, të dhëna transparente dhe përfshirje të komuniteteve lokale. Kuadri europian duhet të zbatohet edhe në vendet kandidate, përfshirë Maqedoninë.

Burimi: makfax.com.mk