ROMË – Italia zgjat kontrollet kufitare me Spanjën mes tensioneve për emigracionin

ROMË, 31 gusht /ATSH-DPA – Italia ka vendosur të zgjasë edhe me 15 ditë kontrollet në kufijtë ajrorë dhe detarë me Spanjën, në kuadër të një mosmarrëveshjeje mes dy vendeve lidhur me emigracionin.

Masa, e vendosur një muaj më parë nga qeveria e kryeministres Giorgia Meloni, u ndërmor pas mbërritjes së mijëra emigrantëve në Ceuta, enklavën spanjolle në Afrikën e Veriut.

Ministria e Brendshme italiane deklaroi se rrethanat që çuan në vendosjen e kontrolleve më 1 gusht vazhdojnë të jenë të pranishme.
ministri i Brendshëm italian, Matteo Piantedosi, njoftoi homologun e tij spanjoll, Fernando Grande-Marlaska, për zgjatjen e masës gjatë një bisede telefonike, e cilësuar nga ministria si “konstruktive”.

Kontrollet e rikthyera nga Italia, të ngjashme me praktikat kufitare të periudhës përpara krijimit të zonës pa kontrolle të brendshme të Shengenit, u pasuan një javë më vonë nga masa të ngjashme të Spanjës ndaj udhëtarëve që mbërrijnë nga Italia në porte dhe aeroporte.

Kontrollet spanjolle janë aktualisht në fuqi deri më 7 shtator, ndërsa ende nuk është bërë e ditur nëse Madridi do t’i zgjasë ato.

Roma argumentoi se kontrollet ishin të nevojshme për mbrojtjen e kufijve italianë, duke iu referuar numrit të madh të emigrantëve që mbërritën në Ceuta.