Rritja e kostove të energjisë nxit punën hibride dhe hap mundësi për të rinjtë shqiptarë

Rritja e kostove të energjisë dhe pasiguria gjeopolitike kanë nxitur kompanitë europiane të rishikojnë modelet e punës, duke u kthyer sërish drejt zgjidhjeve hibride dhe punës nga shtëpia. Si pasojë pritet të rritet edhe kërkimi për punonjës jashtë Bashkimit Europian, ku kostoja e punës dhe taksat janë më të ulëta, çka mund të krijojë avantazhe për vendet me fuqinë punëtore më të lirë.

Në Bruksel debati mbi punën në distancë është futur në paketat për menaxhimin e krizës energjetike: Komisioni Europian inkurajon shtetet anëtare të përdorin modele hibride dhe punë nga shtëpia për të ulur konsumin dhe lëvizjet ditore, ndërsa presidentja Ursula von der Leyen ka kërkuar koordinim për të parandaluar rritje të mëtejshme të çmimeve të energjisë, raporton TV Klan.

Analizat ndërkombëtare po pasqyrojnë pasoja të dukshme: Reuters vë në dukje se lufta ka rritur me rreth 22 miliardë euro kostot e lëndëve djegëse fosile në BE, ndërsa Agjencia Ndërkombëtare e Energjisë (IEA) ka rishikuar parashikimet për ofertën dhe kërkesën globale të energjisë. Çmimet fizike të naftës u ngjitën pranë 150 dollarëve për fuçi për dërgesat e menjëhershme, ndërkohë që analiza të tjera, si ajo e LSE, tregojnë se puna hibride është tashmë forma dominuese në qytetet europiane; Eurofound raporton se shumë kompani kanë standardizuar skema 2–3 ditë punë nga shtëpia në javë për pozicionet knowledge-based.

Nëse ky trend konsolidohet, përveç përfitimeve për punëdhënësit europianë, tregu i punës do të bëhet më pak i lidhur me vendndodhjen gjeografike, duke krijuar mundësi reale për të rinjtë shqiptarë që të punojnë për kompani europiane pa u larguar fizikisht nga vendi. Ky perspektivë për pjesën e re të fuqisë punëtore vlerësohet edhe në raporte të mëparshme, sipas TV Klan.