RTSH ka sfidë rikthimin e besimit te publiku

OSBE-ja thirri të martën forumin e dytë për zhvillimin e medias në Shqipëri, një takim që mblodhi zërat e drejtpërdrejtë të përfaqësuesve të institucioneve që ndjekin apo drejtojnë mediat në Shqipëri. Një nga panelet iu dedikua tërësisht përgatitjeve për transformimin e Radio Televizionit Shqiptar, të vetmes media më të madhe publike në Shqipëri.

Që në nisje të forumit, ambasadori i OSBE-së Bern Borchardt nënvizoi rëndësinë për ta transformuar RTSH-në në një media të pavarur profesionale që i shërben publikut të gjerë. “Drejtuesit e lartë të RTSH-së të zgjedhur së fundmi kanë nisur punën për procesin kërkues për transformimin e transmetuesit publik. Do të doja të theksoja arritje të tilla si struktura organizative e miratuar së fundi dhe dy të tjera në fazen finale të miratimit, statusi i RTSH-së, dhe dokumenti i parimeve editoriale. Ne i përgëzojmë këto rezultate fillestare dhe i Inkurajojmë drejtuesit e RTSH-së që të vazhdojnë me këtë hap për të bëre ndryshimet e nevojshme” tha zoti Borchardt.

Për drejtuesit e Radio Televizionit Shqiptar ishte një rast i mirë ky forum dhe paneli i dedikuar medias publike, për të lajmëruar disa etapa të rëndësishme që lidhen me nisjen e procesit transformues të televizionit. Drejtori i Përgjithshëm, z.Thoma Gëllçi tha se sfida me e madhe, është rikthimi i besimit të publikut tek Radio Televizioni në një kohë kur gara e transmetuesit publik duhet të jetë për konkurencën dhe jo vënia nën varësi të partive apo qeverive të rradhës.