Ruçi për mediat bullgare, pakica kombëtare bullgare do jetë urë lidhëse midis Bullgarisë dhe Shqipërisë

Pas takimit të zhvilluar me zëvëndespresidenten e Republikës së Bullgarisë znj.Ilijana Jetova, Kryetari i Kuvendit të Shqipërisë z. Gramoz Ruçi, deklaroi për mediat bullgare që shoqëronin znj. Jotova se:

Gjatë këtij takimi shkëmbyem mendime për lidhjet tradicionale, historike, kulturore dhe njerëzore, por edhe politike dhe ekonomike. Sigurisht që Bullgaria është shumë hapa para nesh si anëtare e Bashkimit Evropian. Ne e konsiderojmë një vend mik dhe në prag të marrjes së Presidencës në Bashkimin Evropian shpresojmë dhe besojmë që do të hapen negociatat edhe për Shqipërinë.

Gjatë bisedës unë  e informova zëvendëspresdientet edhe për hapat e hedhura edhe nga parlamenti i ri shqiptar, veçanërisht përsa i përket reformës në drejtësi, reformës zgjedhore dhe veçanërisht ligjit për pakicat kombëtare ku interesi i zëvendëspresidentes ishte shumë i madh për këtë çështje.

E njoha atë që ky ligj është në përputhje me direktivat e Bashkimit Evropian. Është hera e parë që Shqipëria njeh me ligj, veç pakicave të tjera kombëtare, edhe pakicën bullgare dhe zëvendëspresidentja u interesua gjatë lidhur me vendndodhjen e këtyre pakicave dhe veçanërisht me hapat që do të hedh Shqipëria për implementimin e këtij ligji për tu siguruar pakicës, veçanërisht asaj bullgare, të drejtat dhe liritë e tyre dhe veçanërisht për njohjen e gjuhës amtare.

Unë e garantova atë që nuk ka asnjë pengesë përsa i përket vullnetit politik, nuk ka asnjë pengesë ligjore, asnjë pengesë administrative, dhe duke bashkëpunuar bashkërisht, pakica kombëtare bullgare do të jetë një urë lidhëse për forcimin e marrëdhënieve tona midis dy vendeve, Bullgarisë dhe Shqipërisë.

Faleminderit!