Šarec: Deputetët të mendojnë për përgjegjësinë që kanë — nuk jam dhe nuk do të jem mjet i asnjë pale politike

Raportuesi i Parlamentit Evropian për Malin e Zi, Marjan Šarec, iu drejtua sot me një deklaratë mediave pas dështimit të seancës së djeshme të Kuvendit, ku duhej të diskutohej shkarkimi i kryetarit të Kuvendit, Andrija Mandiq. Mazhoranca parlamentare i mohoi kuorumin debatit, ndërsa vetë Mandiq nuk lejoi as transmetimin televiziv të prozivkës, as hyrjen e përfaqësuesve të mediave në sallë.

Në seancë ishin të pranishëm 39 deputetë, por munguan dy të tjerë që do të siguronin kuorumin e nevojshëm për zhvillimin e debatit. Opozita ka njoftuar se nuk do të bashkëpunojë me qeverinë derisa të mbahet seanca e kërkuar për shkarkimin e Mandiqit, çka e ka thelluar krizën politike në vend.

«Nuk jam dhe nuk do të jem mjet i asnjë pale politike», theksoi Šarec para gazetarëve. Ai shtoi se interesi i tij i vetëm është që Mali i Zi ta përmbyllë me sukses procesin e integrimit dhe të bëhet anëtari i 28-të i Bashkimit Evropian, duke u bërë thirrje deputetëve që të kenë parasysh përgjegjësinë që mbajnë ndaj qytetarëve dhe së ardhmes evropiane të vendit.

Raportuesi evropian paralajmëroi se koha po mbaron dhe se integrimet evropiane duhet të qëndrojnë mbi përplasjet e brendshme politike. Sipas tij, rruga evropiane e Malit të Zi nuk guxon të bëhet peng i krizës aktuale institucionale.

Burimi: Vijesti