Seanca ndaj kryebashkiakes së Roskovecit, Majlinda Bufi, shtyhet për 21 maj

Gjykata e Posaçme ka vendosur të shtyjë seancën ndaj kryebashkiakes së Roskovecit, Majlinda Bufi, për në datën 21 maj. Ajo akuzohet për përdorim të detyrës për veprimtari politike dhe zgjedhore.

Sipas TV Klan, shkak i shtyrjes ishte mungesa e Bufit në seancë; përmes avokatit ajo paraqiti bileta udhëtimi që tregonin se ishte jashtë vendit si e ftuar në një workshop. Avokati Klodian Skënderi deklaroi se, pasi procesi është në fazën e konkluzioneve të mbrojtjes, e akuzuara dëshiron të marrë pjesë personalisht në seancë.

Procesi gjyqësor ndaj Bufit është shtyrë më parë disa herë për t’i dhënë kohë mbrojtjes që të përgatitej. Në seancën e fundit gjykata paralajmëroi se mungesa e përgatitjes mund të konsiderohej si mungesë vullneti dhe do të çonte në shpalljen e vendimit pa vonesa të mëtejshme.

Prokuroria e Posaçme (SPAK) ka kërkuar fajësinë e kryebashkiakes dhe dënimin me një vit burg, të cilin e ka propozuar të konvertohet në dy vjet shërbim prove, raporton TV Klan.