Sekuestrohet kokainë dhe diamante në portin e Durrësit, si u tentua kontrabanda nga Italia në Shqipëri, dështon skema

Një operacion i përbashkët mes Doganës së Durrësit dhe Policisë së Shtetit ka çuar në zbulimin dhe sekuestrimin e katër gurë të çmuar të dyshuar si diamante në Durrës.

Gjatë kontrolleve autoritetet kanë gjetur edhe kokainë dhe po ashtu, është sekuestruar një aparaturë elektronike e përdorur për detektimin e metaleve të çmuara.

Njoftimi:

Dogana Durrës, në bashkëpunim me strukturat e Policisë së Shtetit, bllokuan ditën e sotme gjatë disa kontrolleve të kryera në Portin e Durrësit një sasi lënde narkotike të dyshuar si kokainë, katër gurë të çmuar të dyshuar si diamante, si dhe një aparaturë elektronike për detektimin e metaleve të çmuara.

Gjatë kontrollit të një automjeti të mbërritur me tragetin e linjës Ankona–Durrës, u konstatua një valixhe që përmbante aparaturën detektuese dhe disa aksesorë të montueshëm.

Gjatë kontrollit fizik të një shtetasi që udhëtonte me një tjetër automjet të ardhur nga Italia, u gjetën katër paketime transparente që përmbanin gurë të ngjashëm me diamantet.

Në një automjet tjetër u zbulua një sasi e dyshuar lënde narkotike, kokainë, e fshehur në një veshje të vendosur në kabinën e drejtuesit të mjetit.

Rastet iu referuan strukturave kompetente për veprime të mëtejshme procedurale dhe hetimore.