SHBA – Ligj i ri në Nju Jork: Asnjë klient nuk mund të refuzohet për tipin e flokëve

NEW YORK, 2 shtator /ATSH – ANSA/ -– Parukierët në Nju Jork nuk mund të refuzojnë më klientët për shkak të tipit apo strukturës së flokëve.

Sipas një ligji të ri, që ka hyrë në fuqi më 1 shtator, studentët e kozmetologjisë duhet të trajnohen për të punuar me të gjitha llojet e flokëve, përfshirë flokët kaçurrelë, shumë të dendur dhe afro.

Nisma synon të parandalojë rastet kur klientët refuzohen nga sallonet ose marrin trajtim të papërshtatshëm për shkak të strukturës së flokëve.

“Bëhet fjalë për akses të barabartë në shërbime”, deklaroi deputetja Michaelle Solages, nismëtarja e ligjit.

“Asnjë banor i Nju Jorkut nuk duhet të hyjë në një sallon dhe të refuzohet apo të marrë një trajtim të papërshtatshëm për shkak të strukturës së flokëve.

Tani, me miratimin e këtij ligji, kjo nuk duhet të ndodhë më”, shtoi ajo.

Edhe New Jersey ka ndërmarrë një nismë të ngjashme. Në janar, shteti miratoi një ligj për zgjerimin e trajnimit të parukierëve të ardhshëm lidhur me trajtimin e flokëve kaçurrelë dhe me teksturë.