SHBA rrit praninë ushtarake në Lindjen e Mesme

Shtetet e Bashkuara kanë shtuar praninë e tyre ushtarake në Lindjen e Mesme mes tensioneve me Iranin. Sipas raportimit të The New York Times, që nga muaji shkurt numri i trupave amerikane në rajon është rritur me rreth 10 mijë ushtarë, duke e çuar totalin në mbi 50 mijë personel.

Raporti thekson se para nisjes së operacioneve ushtarake amerikane kundër Iranit, rreth 40 mijë trupa ishin të dislokuara në bazat amerikane në Arabinë Saudite, Emiratet e Bashkuara Arabe, Irak, Jordani, Katar, Kuvajt dhe Bahrein.

Sipas burimeve të gazetës, të gjitha forcat amerikane në rajon mbeten në gatishmëri të plotë luftarake. Ndërkohë, administrata amerikane po dërgon sinjale të paqarta lidhur me mundësinë e rifillimit të operacioneve ushtarake kundër Iranit, duke shtuar pasigurinë për zhvillimet e ardhshme në rajon.