SHBA sanksionon bankën ruse VTB për ndihmë Iranit në shmangien e sanksioneve

Departamenti amerikan i Thesarit njoftoi të hënën sanksione të reja ndaj bankës ruse VTB, duke e akuzuar atë për ndihmë ndaj Iranit në shmangien e sanksioneve dhe për mbështetje të regjimit të Teheranit. Masa është pjesë e fushatës së presionit ekonomik “Operation Economic Outcast” që administrata Trump ka shpallur kundër Iranit.

VTB, kreditori i dytë më i madh i Rusisë, ishte tashmë e sanksionuar nga SHBA që nga viti 2022 pas pushtimit rus të Ukrainës. Por sipas zyrtarëve amerikanë, banka ka vazhduar të shërbejë si një shteg kryesor financiar për Iranin: ka hapur zyra në territorin iranian, ka ndërtuar lidhje bankare me institucione iraniane të sanksionuara dhe ka ndihmuar në lëvizjen e miliarda dollarëve të aseteve iraniane.

“Kjo bankë hapi zyra në Iran, ndërtoi lidhje bankare me institucione financiare iraniane të sanksionuara dhe punoi për të lëvizur miliarda dollarë asete iraniane,” njoftoi Departamenti i Shtetit. Sipas Thesarit, VTB siguron llogari kompensimi për Bankën Qendrore të Iranit dhe për disa banka iraniane të sanksionuara, duke lehtësuar shkëmbimin mes rialit iranian dhe rublës ruse.

Sekretari i Thesarit Scott Bessent deklaroi se “Thesari do të vazhdojë të godasë dhe të shkatërrojë ata që ofrojnë mbështetje materiale, teknologjike apo financiare që i lejon regjimit iranian të mbajë në këmbë sipërmarrjen e tij terroriste”. Ai paralajmëroi se institucionet financiare të huaja që vazhdojnë të merren me VTB-në janë të ekspozuara ndaj rrezikut të sanksioneve dhe duhet t’i ndërpresin menjëherë këto marrëdhënie.

Burimi: Reuters