ITALI – Mattarella: Inteligjenca artificiale dhe lajmet e rreme rrezikojnë demokracinë

FIRENCE, 26 tetor /ATSH-ANSA/ – Presidenti i Italisë, Sergio Mattarella paralajmëroi për rreziqet që paraqesin përdorimi i pakontrolluar i inteligjencës artificiale (IA) dhe përhapja e lajmeve të rreme, të cilat mund të ndikojnë në opinionin publik dhe në vendimmarrjen e qytetarëve.

Gjatë hapjes së edicionit të pestë të Festivalit të Rajoneve dhe Provincave Autonome, në Firence, Mattarella kërkoi masa të shpejta dhe efektive për të parandaluar përdorimin e papërshtatshëm të inteligjencës artificiale.

Ai theksoi se kjo teknologji ofron mundësi të mëdha për përparim, por zhvillimi i pakontrolluar dhe përqendrimi i fuqisë në duart e vetëm disa kompanive, mund të sjellin pasoja të paparashikueshme.

Sipas presidentit italian, është e domosdoshme vendosja dhe zbatimi i rregullave, që garantojnë përdorimin e përgjegjshëm të inteligjencës artificiale dhe mbrojtjen e të drejtave të qytetarëve.

Ai vlerësoi gjithashtu kuadrin rregullator të Bashkimit Evropian në këtë fushë.

Mattarella paralajmëroi se manipulimi i informacionit përmes internetit dhe përhapja e lajmeve të rreme, mund të orientojnë qëndrimet dhe zgjedhjet e qytetarëve, duke rrezikuar vlerat themelore të demokracisë.

“Manipulimi i informacionit, edhe përmes përhapjes së lajmeve të rreme dhe duke shfrytëzuar mundësitë që ofron interneti, mund të ndikojë në opinionin publik dhe të orientojë qëndrimet dhe zgjedhjet e tij”, u shpreh ai.

Presidenti italian theksoi se institucionet duhet të përshtaten me ndryshimet e shpejta teknologjike, dhe të bashkëpunojnë për të mbrojtur interesin publik dhe besimin e qytetarëve te demokracia. /