SHBA – Trump: Si Rusia, ashtu edhe Ukraina kanë shkelur armëpushimin energjetik

UASHINGTON, 13 tetor /ATSH-Ukrinform/ – Presidenti i Shteteve të Bashkuara të Amerikës, Donald Trump, deklaroi se, sipas tij, si Rusia, ashtu edhe Ukraina kanë shkelur armëpushimin energjetik që ai njoftoi, me qëllim ndalimin e sulmeve ndaj infrastrukturës energjetike të të dy vendeve.

“Duhet ta shqyrtoj këtë, sepse ka pasur shkelje nga të dyja palët”, u shpreh Trump, duke iu përgjigjur një pyetjeje të transmetuesit publik ukrainas “Suspilne” lidhur me akuzat e Kievit se Rusia kishte shkelur armëpushimin.

Sipas agjencisë ukrainase të lajmeve “Ukrinform”, presidenti amerikan tha se do të shqyrtonte situatën, pa dhënë hollësi të tjera për shkeljet që përmendi.

Trump njoftoi armëpushimin energjetik më 11 tetor, pas një bisede me presidentin rus, Vladimir Putin, gjatë së cilës u diskutua edhe furnizimi me naftë nga Rusia.

Sipas njoftimit të tij, armëpushimi do të hynte në fuqi menjëherë.

Ukraina shprehu pasiguri për armëpushimin e njoftuar nga Trump.

Presidenti ukrainas, Volodymyr Zelensky, tha se nuk ishte në dijeni të një marrëveshjeje të tillë, por konfirmoi se Ukraina ishte e gatshme të ndalte sulmet ndaj infrastrukturës energjetike ruse, nëse Moska do të bënte të njëjtën gjë.

Zelensky deklaroi gjithashtu se ushtria ukrainase kishte marrë udhëzimet përkatëse pas njoftimit të presidentit amerikan.

Më 12 tetor, presidenti ukrainas akuzoi Rusinë për shkeljen e armëpushimit pas një sulmi ndaj një centrali termik në qytetin e Harkivit.

Ai i kërkoi Uashingtonit të sigurohej që Moska t’i përmbahej çdo marrëveshjeje për ndalimin e sulmeve ndaj objekteve energjetike.

I pyetur për mundësinë e arritjes së një marrëveshjeje për t’i dhënë fund luftës, Trump tha se si Putin, ashtu edhe Zelensky dëshironin një marrëveshje, por nuk dinin si ta arrinin atë.

Ai shtoi se Shtetet e Bashkuara të Amerikës do t’i detyronin palët të arrinin një marrëveshje.

Trump shprehu gjithashtu mendimin se Putini ishte më i interesuar për një marrëveshje paqeje sesa Zelensky.

Ndërkohë, Kremlini deklaroi sot se kontaktet lidhur me armëpushimin energjetik vijonin, por zëdhënësi i presidencës ruse, Dmitry Peskov, nuk dha hollësi për palët me të cilat po zhvilloheshin bisedimet.

Ministria ruse e Mbrojtjes deklaroi se gjatë sulmeve të natës, nuk ishin goditur objektiva të infrastrukturës energjetike ukrainase.

Megjithatë, sulmet ruse me raketa dhe dronë ndaj qyteteve dhe infrastrukturës së transportit vijuan.

Armëpushimi energjetik synon të ndalojë sulmet ndaj objekteve që sigurojnë energjinë elektrike, ngrohjen dhe furnizimin me energji, të cilat janë thelbësore për jetën e civilëve, veçanërisht përpara dimrit. /