SHBA – Trumpi falënderon Putinin për lirimin e Stephen Hubbard: Nuk dhamë asgjë në këmbim

UASHINGTON, 21 tetor /ATSH-DPA/- Presidenti amerikan Donald Trump ka falënderuar presidentin rus Vladimir Putin për lirimin e shtetasit amerikan, Stephen Hubbard, i cili ishte burgosur me akuzën se kishte luftuar përkrah forcave ukrainase. Trump theksoi se Shtetet e Bashkuara nuk u detyruan të jepnin asgjë në këmbim të lirimit të tij.

“Nuk ishte i nevojshëm asnjë shkëmbim të burgosurish për këtë lirim”, shkroi sot Trump në platformën e tij “Truth Social”, duke e cilësuar këtë veprim si një situatë të paprecedentë për Rusinë.

Trump tha se gjatë një bisede telefonike me Putinin javën e kaluar, i kishte kërkuar personalisht lirimin e Stephen Hubbard.

“Stephen është duke u kthyer në shtëpi dhe së shpejti do të jetë pranë familjes së tij”, shkroi Trump.

Ai kritikoi gjithashtu administratën e paraardhësit të tij, Joe Biden, për mosarritjen e lirimit të Hubbard.

Putin njoftoi për lirimin e tij gjatë bisedimeve me të dërguarin amerikan Steve Witkoff, të zhvilluara sot në Shën Peterburg. Ai tha se Hubbard ndodhej tashmë në aeroportin e qytetit.

Zëdhënësi i Kremlinit, Dmitry Peskov, deklaroi se Hubbard ishte liruar për arsye humanitare.

Në vitin 2024, Hubbard u dënua me një periudhë të gjatë burgimi, pasi u akuzua se kishte shërbyer si mercenar përkrah forcave ukrainase kundër trupave ruse.

Witkoff falënderoi Putinin për lirimin, duke thënë se familja e Hubbard dhe populli amerikan e mirëpritën këtë vendim.

Në gusht, Putini liroi edhe një tjetër të burgosur amerikan, ish-ushtarin Robert Gilman, pa kërkuar në këmbim lirimin e ndonjë shtetasi rus.

Ky veprim përbënte një përjashtim nga praktika e zakonshme e shkëmbimit të të burgosurve. /