Shembet rezidenca për studentë në Delhi, dhjetëra persona mbeten të bllokuar nën rrënoja

Një ndërtesë banimi pesëkatëshe është shembur në kryeqytetin indian, Delhi, duke shkaktuar një viktimë dhe duke lënë dhjetëra persona, kryesisht studentë, të dyshuar të bllokuar nën rrënoja.

Ngjarja ndodhi rreth orës 13:30 me kohën lokale, në zonën Satya Niketan, në jugperëndim të Delhit. Dëshmitarët kanë deklaruar për mediat lokale se deri në 50 persona mund të ndodheshin brenda ndërtesës në momentin e shembjes.

Sipas NDTV, duke cituar policinë lokale, të paktën një person ka humbur jetën, ndërsa dy të tjerë ndodhen në gjendje kritike. Deri tani raportohet se gjashtë persona janë nxjerrë të gjallë nga rrënojat.

Ndërtesa, e njohur si “Hostel Daze” dhe e vendosur pranë kampusit të Universitetit të Delhit, shërbente si rezidencë për studentë. Në bodrumin e saj po kryheshin punime ndërtimi në momentin e shembjes.

Shumë prej studentëve besohet se ndodheshin në dhomat e tyre, pasi ishte ditë e diel dhe nuk zhvilloheshin mësime.

Një anëtar i asamblesë legjislative që ndodhej në vendngjarje tha se disa prej personave të bllokuar kishin arritur të bënin telefonata nga nën rrënoja, duke dhënë shpresë për gjetjen e të mbijetuarve.

Ndërkohë, dëshmitarët kanë raportuar se edhe një ndërtesë tjetër pranë hostelit është shembur. Ekipet e emergjencës vijojnë operacionet e kërkim-shpëtimit në zonë.