Shia LaBeouf në telashe ligjore, pranon fajësinë në gjykatë

Shia LaBeouf ka pranuar fajësinë për akuzat që lidhen me një përleshje gjatë festimeve të Mardi Gras në New Orleans.

Gjatë seancës gjyqësore të zhvilluar të mërkurën, gjyqtarja Juana Lombard i dha aktorit një dënim prej gjashtë muajsh me kusht dhe dy vite provë.

Përveç kësaj, LaBeouf duhet të ndjekë programe rehabilitimi për abuzimin me alkoolin, trajnime për ndërgjegjësimin social dhe kurse për menaxhimin e zemërimit.

Aktori u akuzua për tre raste sulmi fizik pas një konflikti me dy persona që po e nxirrnin nga një lokal, ku sipas raportimeve ai po shkaktonte shqetësime dhe po shfaqte sjellje agresive. Njëri prej të përfshirëve e cilësoi më vonë incidentin si krim urrejtjeje, duke pretenduar se ishte ofenduar me një term homofobik, por gjykata refuzoi të shtonte akuza të tjera.

Avokatja e LaBeouf, Sarah Chervinsky, e minimizoi ngjarjen duke e përshkruar si “asgjë më shumë se një përplasje të vogël në një bar gjatë Mardi Gras”.

“Zoti LaBeouf erdhi në gjykatë për të marrë përgjegjësinë për pjesën e tij në këtë incident dhe e bëri këtë. Tani ai dëshiron të fokusohet te familja, puna dhe projektet e reja krijuese”, deklaroi ajo.

Sipas dokumenteve gjyqësore, incidenti ndodhi pak pas mesnatës në lokalin R Bar, ku LaBeouf dyshohet se goditi me grushte një person që po përpiqej ta largonte nga ambienti. Ai u kthye më pas në lokal me sjellje edhe më agresive dhe, sipas akuzave, sulmoi sërish të njëjtin person si dhe goditi një tjetër në hundë.