Shkupi kërkon takim zyrtar Mucunski–Petrova-Çamova në Sofje: zhbllokim i dialogut pas këshillës së Fon der Lajen

Shkupi ka kërkuar zyrtarisht një takim mes kryediplomatit Timço Mucunski dhe ministres së Punëve të Jashtme të Bullgarisë, Velislava Petrova-Çamova, konfirmoi për agjencinë shtetërore të lajmeve Ministria e Punëve të Jashtme dhe Tregtisë së Jashtme, siç shkruan portali Kolegium.

Nëse pranohet, takimi do të organizohet javën e ardhshme në Sofje, në margjinat e takimit ministror kushtuar Korridorit 8, transportit dhe projekteve infrastrukturore që përfshijnë të dy vendet.

Kërkesa vjen pas vizitës së sotme në Shkup të presidentes së Komisionit Europian, Ursula fon der Lajen, e cila e këshilloi kryeministrin Hristijan Mickoski që ministrat e dy vendeve të kërkojnë një takim bilateral. “Nga presidentja mora këshillë – javën e ardhshme ministri ynë i punëve të jashtme është në Sofje, arsyeja është Korridori 8 dhe projektet që po lëvizim në kuadër të atij korridori, t’i kërkojmë pritësit një takim në bazë bilaterale. Menjëherë i kërkova ministrit të dërgojë notë diplomatike dhe të kërkojë kohë për takim me kolegen e tij dhe ta nisim procesin diku”, deklaroi Mickoski.

Edhe vetë Mucunski ka folur për këtë kërkesë, ndërsa nga Sofja nuk erdhi kundërshtim: pala bullgare theksoi se Bullgaria mbetet e hapur për dialog konstruktiv me Maqedoninë e Veriut, ndërsa procesi i anëtarësimit të vendit është çështje europiane.

Marrëdhëniet mes dy vendeve u ftohën në vitin 2020, kur Sofja vuri veton ndaj kornizës negociuese të vendit për shkak të mosmarrëveshjeve për gjuhën, historinë dhe pakicën bullgare. Me ndërmjetësimin e partnerëve europianë u gjet një kompromis dhe më 19 korrik 2022 vendi mbajti Konferencën e Parë Ndërqeveritare me BE-në, por për të mbajtur të dytën dhe për të hapur kapitujt, Kuvendi duhet të miratojë ndryshimet kushtetuese – qeveria aktuale e Shkupit thotë se nuk do të hyjë në këtë proces pa garanci se nuk do të ketë kushte të reja bilaterale nga pala bullgare.