Shpërthim me lëndë plasëse në një biznes Laç

Një shpërthim me lëndë plasëse është regjistruar në orët e para të mëngjesit të kësaj të enjteje, më 4 qershor, në qytetin e Laçit.

Sipas informacioneve paraprake, rreth orës 03:30, në portën e jashtme të një dyqani në pronësi të shtetasit me inicialet Gj. L. ka shpërthyer një sasi e dyshuar lënde plasëse. Si pasojë janë shkaktuar vetëm dëme materiale, ndërsa nuk raportohet për persona të lënduar.

Menjëherë pas njoftimit, në vendngjarje kanë mbërritur shërbimet e Policisë dhe grupi hetimor, të cilët kanë kryer veprimet e para procedurale dhe kanë nisur hetimet për zbardhjen e ngjarjes.

Nën drejtimin e Prokurorisë, vijon puna për sqarimin e plotë të rrethanave, dokumentimin ligjor të rastit, si dhe identifikimin dhe kapjen e autorit ose autorëve të mundshëm.

/tvklan.al