Sistemi i ri zgjedhor mbështetur në rekomandimet e OSBE-ODIHR

-Sistemi i ri zgjedhor duhet të bëhet në mbështetje të rekomandimeve të OSBE-ODIHR dhe të merren shembujt më të mirë nga vendet e tjera ku garantohet liria e barazia e votës së qytetarëve.

Kështu u shpreh Kryetarja e Lëvizjes Socialiste për Integrim, Monika Kryemadhi në një takim me Kreun e Misionit të ODIHR per zgjedhjet, Peter Tejler, i cili prezantoi raportin për zgjedhjet parlamentare.

Kryemadhi vlerësoi sensin përgjithësisht realist të raportit, ku konfirmohet një pjesë e problemeve që janë ngritur para zgjedhjeve siç janë shitblerja e votës, përfshirja e policisë në zgjedhje, ndikimi i eksponentëve kriminalë në votime, dhe cënimi i të drejtës së qytetarëve për një proces zgjedhor ku garantohet vullneti i tyre për të mbështetur lirisht partinë politike që përfaqëson më mirë pikëpamjet e tyre.

Gjatë bashkëbisedimit u diskutua dhe për rekomandimet e OSBE-ODIHR për reformën zgjedhore ku konsensusi e transparenca u cilësuan si kushte të domosdoshme për të krijuar besimin e qytetarëve te procesi zgjedhor.