Skënderbeu “peshkon” në Kosovë, zyrtartizon mbrojtësin Luan Lleshi

Klubi korçar duket se ka një strategji të qartë për merkaton: të afrojë lojtarë të rinj në moshë për të forcuar grupin, por edhe financat në të ardhmen. I fundit që është bashkuar zyrtarisht me këtë ekip është Luan Lleshi.

Bëhet fjalë për një mbrojtës 20-vjeçar që vjen nga Llapi. Presidenti Ardjan Takaj ka pasur gjithmonë si strategji afrimin e elementëve të spikatur dhe të rinj në moshë, të cilët i shërbejnë skuadrës dhe më pas shiten në kampionate të huaja. Vazhdimisht korçarët kanë transferuar lojtarë jashtë vendit dhe më këtë metodë pune vazhdojnë edhe tani, pas rikthimit në Abissnet Superiore.

“Luan Lleshi zyrtarisht bardhekuq. Mbrojtësi 20-vjeçar nga Kosova, vjen nga KF Llapi dhe ka qenë pjesë edhe e përfaqësueseve zinxhir të Kosovës”, – shkruan klubi korçar në njoftimin për afrimin e mbrojtësit Lleshi.

Te Skënderbeu priten të tjera lëvizje deri në mbylljen e merkatos, në mënyrë që trajneri Julian Ahmataj të ketë një skuadër të kompletuar për sezonin e ri. Para Lleshit Skënderbeu ka marrë lojtarë si, Nikola Velichkovski (20 vjeç), Xhemil Jahiji (23 vjeç), apo Amadou Diallo (23 vjeç).