Sot, Dita Botërore Humanitare

19 gushti shënon Ditën Botërore Humanitare, një ditë kushtuar nderimit të punonjësve humanitarë dhe solidaritetit me njerëzit e prekur nga krizat në mbarë botën.

“Në situata ku jetët janë në rrezik, njerëzit që angazhohen për të ndihmuar nuk duhet të jenë kurrë objektiv i dhunës”, thotë OKB.

Megjithatë, punonjësit humanitarë vijojnë të vriten, plagosen, rrëmbehen, ndalohen dhe pengohen gjatë përmbushjes së misionit të tyre. Shumica e tyre janë staf vendas, që ofrojnë ndihmë për komunitetet e tyre.

Sipas së drejtës ndërkombëtare, civilët, përfshirë punonjësit humanitarë dhe personelin mjekësor, duhet të respektohen dhe të mbrohen. Palët në konfliktet e armatosura kanë detyrimin të lejojnë dhe lehtësojnë ofrimin e ndihmës humanitare për njerëzit në nevojë, në përputhje me normat e së drejtës ndërkombëtare.

Sulmet ndaj personelit humanitar kanë pasoja që shkojnë përtej individëve të prekur drejtpërdrejt. Ato ndërpresin shpërndarjen e ushqimeve, shërbimet shëndetësore, mbrojtjen dhe ndihmën e tjera jetike, duke i lënë komunitetet e prekura me edhe më pak mundësi për të mbijetuar dhe për t’u rimëkëmbur.

Dita Botërore Humanitare është një kujtesë se mbrojtja e atyre që ndihmojnë është thelbësore për mbrojtjen e vetë komuniteteve që përballen me luftëra, fatkeqësi dhe kriza humanitare.

Sipas të dhënave të OKB-së, deri në maj 2026, më shumë se 252 milionë njerëz kishin nevojë për ndihmë humanitare dhe mbrojtje.