Spajiq në Bangkok: Tajlanda do të heqë vizat për shtetasit e Malit të Zi

Pas marrjes së kërkesës zyrtare të palës malazeze, Tajlanda do të heqë vizat për shtetasit e Malit të Zi, siç njofton Biznis CG, duke cituar komunikatën e Qeverisë. Këtë ia konfirmoi kryeministri i Tajlandës, Anutin Çarnvirakul, kryeministrit Milojko Spajiq gjatë takimit të tyre në Bangkok.

Spajiq ndodhet në Bangkok me rastin e pjesëmarrjes në takimin vjetor të Bankës Botërore dhe FMN-së dhe sot u takua me kryeministrin e Mbretërisë së Tajlandës. Në takim morën pjesë edhe ministri i Financave, Novica Vukoviq, dhe guvernatorja e Bankës Qendrore, Irena Radoviq, ndërsa bashkëbiseduesit folën edhe për rëndësinë e takimeve vjetore të FMN-së dhe Grupit të Bankës Botërore si rast për biseda mbi sfidat kryesore të ekonomisë globale.

Gjatë takimit u konfirmua gatishmëria që, mbi bazën e marrëdhënieve të mira e miqësore, të thellohet bashkëpunimi në të gjitha fushat me interes të ndërsjellë, me theks te turizmi mjekësor. U theksua gjithashtu nevoja e forcimit të bazës kontraktuale-juridike, në mënyrë që institucionet dhe ekonomitë e dy vendeve të lidhen më konkretisht.

Turizmi u veçua si degë e rëndësishme ekonomike për të dy vendet. Shkëmbimi i përvojave, lidhja e ekonomive turistike dhe përmirësimi i promovimit reciprok u njohën si drejtime të mundshme veprimi të përbashkët. Çarnvirakul vuri në dukje njohjen ndërkombëtare në rritje të Malit të Zi si destinacion tërheqës turistik dhe gatishmërinë e Tajlandës për të ndarë përvojat e saj në turizëm.

Spajiq theksoi se dy vendet kanë bazë të mirë që marrëdhëniet miqësore t’i kthejnë në bashkëpunim ekonomik më përmbajtësor dhe se një kornizë kontraktuale më e fortë do t’i kthente mundësitë në projekte e partneritete konkrete.